Pehla adhyaay...Ek adbhut anubhav...

Ek asaadharann vijay yaatra…

Haan…yeh kahani ek aise insaan ki hai…jinki jeevan gaatha ko mere nazariye se dekhenge…toh ek asaadharann vijay yaatra hi dikhegi…

Dekh kar mann bechain ho utha…ki ikkisvi sadi ki is chhal, kapat aur swarth se bhari duniya mein aaj bhi aise log hain…jinki taraf dekhne ka mann karta hai…jinki kahani sunne ka mann karta hai…jinse bohot kuch seekhne ka mann karta hai…

Mrs. Shrabani Deodhar…Yeh naam jitna adbhut hai…yeh khud usse kai zyada adbhut hain…Inki kahani ka sirf ek adhyaay padhne par dil kitna kuch kehne aur sunne ko aatur ho gaya…

Ek pal ko aapke paas sab kuch ho…aur agle hi pal pata chale ki woh aapse door jaa raha hai…Kya haal hoga? Unki vijay yaatra ki kahani is mod se shuru hui thi…

Itna kuch hone ke bavjood apne aapko ek parvat ki tarah jode rakha…jo bahubali ki tarah mazboot bhi tha aur barf ki tarah sheetal bhi…Sehensheelta aur dheerta ki ek adwitiya misaal…Jinhone zindagi jeene ka nazariya hi badal diya…

Unke saath sirf kuch pal bitane se dil aur dimaag mein ek naya josh…naya jazba…nayi lagan bhar gayi…agar aisa hua hai…toh hum toh keh deten hain…hum aapko itni asani se chhodenge nahi…dil ke aise kone mein rakh denge jahan se aap bahar hi na nikal payen…

Aaj ke zamane mein logon ko dusron se zyada unke bank balance mein zyada ruchi hoti hai…meri maniye…toh ek din inke saath bitakar dekhiye…kore kaagaz par likh ke dene ko taiyaar hun mein…aap zindagi ke mayne seekh jayenge…

British ke zamane mein kahin kisi ko kohinoor mil gaya tha…toh hahakar mach gaya tha…aaj mere paas ek nahi…3 anmol ratan hain…aur kisi ko kanon kaan khabar bhi nahi…

Shrabaniji ne apne jeevan kaal mein bohot si ladaiyan jeeti hain…haan…jazbaaton ki jung…aasan nahi hai jeetna…magar har jung jeetkar unhone apne aapko sahi maiynon mein veer bana diya…har adchan ko paar kiya…aur aaj safalta unki paaon ke dhool banne ko chhatpata rahi hai…

Aaj itna hi hai kehna…kyunki unse phir ek baar milne ki hasrat jaagi hai…phir ek baar gaurvanvit hona hai…phir ek baar woh vijay yaatra padhni hai…